Herta Wacker: Uff’s Babier gebabbelt „15“

hertawackerGeschden bei de Nochrichte heb ich uff oamol an Sodom un Gommora denke misse. Wer von Eich im Konfi rmandeunnericht war, der erinnert sich doch bestimmt an die Geschichte aus de Bibel. Die kimmt e paar Seite noch em Adam un de Eva. De liewe Gott wollt Sodom und Gomorra vernichte, er hot’s ewwe nit für sich behoale kenne un hot mim Abraham driwwe geschwätzt. Der hot ihn dann iwweredde kenne, dass er die Leit verschont, aach wann „ihr Schuld zum Himmel schreit“ (Zitat vum liewe Gott). Nur missde 10 Oustännische gefunne wern. Zum Test hot er zwo Engel geschickt als Kerle verklaad, weil bei Kerle nämlich koane an Engel denkt. Die sollde prüfe, wie se dort behannelt wern. De Lot, der war e Nachgeschwisterkind vum Abraham ( hochdeitsch is des en Sohn von seum Bruder), hot sie uffgenumme un en Kuche gebacke, wahrscheuns en Sandkuche, der geht schnell, un weil aach die Wüste in de Näh war. De Herrgott hot sich gefraat un es war also quasi „alles im Lot“. Doch dann hewwe die Sodomite (vun dene stammt die Perversität ab) un die Gomorraner em Lot seu Haus umzingelt un hewwe laut gekrische. Vermutlich irgend en Bleedsinnn wie „Wir sind das Volk!“ orre halt was anneres. Dann hewwe sie die Auslieferung von de Kerle gefordert, nadierlich ohne zu merke, dass des Engel warn. Ewwe wann me blind is vor Wut, dann guckt me nit mim Herz, wie de kleine Prinz schun gsoad hot. Kurz un gut: de Lot war de einzig Oustännisch un hot abhaue dürfe. Nur seu neigierisch Fra hot sich beim Rimgucke in Salzsäure verwannelt. Wie ich dann sou dodriwwe simbeliert heb, heb ich gedenkt: Sodom un Gommora, des is doch wie in de EU. Die Engel, des sin die Flüchtling, wou zu uns kumme un unser Mitmenschlichkeit uff die Prob stelle. De Lot, des sin mir Deitsche, die wou die Fremde uffnemme un Kuche backe. Ja, ewwe wer is blouß die Fra vom Lot? De Cameron vielleicht? Wann ewwe mir Deitsche de Lot wärn, dann dürfde mir doch eigentlich abhaue!? Die Merkel is dodebei wie de Abraham un versucht Grexit un Brexit zu verhinnern un die annern mache weire Sodom un Gomorra. Bin gespannt, wer als nächster mit Austritt droht!? Orre droht de Erdogan vielleicht mit Eutritt? Wann ich Merkel wär, ich hätt koa Lust mehr, alsfurt mit dene Dickköpp zu verhannele. Ich deed en Dexit mache. Mir sin doch sowieso isoliert, laut Thomas Demasseur. Menschenrechte, Meinungsfreiheit, Umwelt…, jeder macht, was er will! Zu dere EU will ich jedenfalls nit gehörn. Also ich tret aus un mach en Hexit!
Bleibt wacker, Aier Herta

Hinterlasse jetzt eine Antwort