Herta Wacker: Uff’s Babier gebabbelt „16“

wackerAlsemol freeg ich mich, wou unse Welt hesteuern dud. Sou wie’s aussieht in die Steueroase! Ich freeg mich aach, ob iwwehabt noch jemand es Steuer in de Hand hot. Dud nit grad alles aus em Ruder laafe? Ich glaab unse Politiker sin total iwwefordert mim Regiern. Veel warn ja schun vurher iwwefordert un hewwe desdeweje bei annern abschreiwe orre abhörn misse. Veel schwätze druff lous, heit sou un moje sou. Veel doun oufange un nit firdisch mache: die Energie, die Flege, die Gesundheit un die Steuer. Aach annern Uffgawe hewwe se noch nit erledigt: de Geburterückgang, die Altersschwämme un die Kigaplätz. Noch nit emol fir die Kloane hewwe se geniegend Plätz, un die brauche doch nur Plätzchen. Alsfurt misse die Journaliste Skandale uffdecke, un dann sin unse Politiker sou eug betroffe als wär des Ouglick grad irschd vum Himmel gefalle. Wie beim Briefkaschde-Skandal vun Panama. Den doun se jetzt wirre wochelang eug ernst nemme, un zum Schluss bleibt doch alles wie’s is. Ernst nemme, beobachte und Vurschläg mache, was anneres fällt dene nit eu, dene Eufallspinsel! Des is doch nit regiert! Regiern kimmt bekanntlich aus em Ladeunische un haast „lenken“. De Ladeuner säigd ewwe aach: „Der Geist denkt und das Geld lenkt“. Des erklärt nadierlich alles! Guckt nur emol, wer uff de Panama-Liste druff is, des sin doch immer dieselwe reiche Scheiche, weil se de Kanal nit voll krieje. Un grad is en neie Fifa-Boss gewählt wurn, weil vurher immer manipuliert wurn is (es kennt aach moneypuliert haase) , un schun is de Herr Infantili aach schun wirre bei de Vedächtige debei! De Nico Rossberg wär allerdings aach debei. Lebt der nit in Monaco!? Do kennt der doch durt Steuern hinnerziehe. Vielleicht is dem seu Geld ja nur in de falsche Briefkaschde kumme!? Des bassiert unserm Briefbot aach alsemol. Ich bin ja blouß gespannt, wer noch alles en Briekaschde in Panama hot. Beim Dieter Bohlen orre em Ernst-August von Hannover deed’s mich nit wunnern. Ewwe wann de Günther Jauch orre die Helene Fischer uff de Liste wärn, des wär en Schock fi r die Leit. Weil die Oustännische immer weniger wern, de Genscher is ja aach grad gesturwe. Wirre e Kornifere furt! Was hot der alles gemanaged: Terror, Hochwasser, Wiedervereinigung! Un jetzt misse me uns vum Erdogan helfe losse! Dauernd muss unsen Botschafter bei dem oudanze un sich entschuldische, wann bei uns en Komiker en Witz macht. Fehlt bloß noch, dass die Merkel e Koppduch uffsetze muss, wann se mit dem telefoniert. Des will ich me garnit vurstelle! Na dann, bleibt wenigstens Ihr wacker,
Aier Herta.

Hinterlasse jetzt eine Antwort