Herta Wacker: Uff’s Babier gebabbelt „18“

Herta Wacker

Herta Wacker

De Heiko Maas will e Gesex mache, wou …  Halt, des war jetzt en Verschreiber! Es soll nadierlich haaße: de Heiko Maas will e Gesetz mache, wou Sex in de Werbung verbiere soll. Was er ewwe genau verbiere will,  des waaß me noch nit genau. Trotzdem regt sich schon jeder uff. Dass die FDP nit defür is, des wunnert mich nit. Die sin ja von ihrm Programm her schon sehr freizügig. Ich vermut ja, dass unsern Justizminister nackische Brüste und Ärsch uff de Plakate verbiere will. Was hewwe die aach  in de Werbung  velurn? Außer wann’s halt um Unnerhose orre Unnerhemde geht. Ewwe do konn me genausou gut en Aff nemme, wie bei de Werbung von Trigema. Un des is doch veel lustiger wie e nackischie Fra, die wou sich dämlich hestellt un bleedsinnige Sätz babbelt wie: „hier werden sie geholfen“. Orre war die garnit nackisch? Noa, ich glaab, die war nur bleed. Und zwar bleed genug, dass me es Nackische garnit gebraucht hot. Iwwerischens gitt’s aach schon nackische Männer in de Werbung, beim Deodorant zum Beispiel. Un do isses  ewwe aach wichtig, dass de Kerl nackisch is un demonstriern konn, wie me’s rischdisch macht.  Sunschd deen’s veel Männer bestimmt uffs Hemd druffspritze. Ewwe guckt nur emol uff die Fernsehzeidunge! Do tummele sich doch uff de Titelseite nur Weibsleit mit durchsichdische Bikinis mit  Körbschengröße Zweimannzelt. Ja, glaawe die Zeitungsmacher dann, dass nur Männer Fernseh gucke? Do kennt doch emol de Jogi Löw orre de Claus Kleber orre de Andre Riö mit freiem Owerkörper orre in e re nasse Badehos vurne drufff seu! Ewwe ehrlich gsoad, is mir des ganze Thema nit sou wichtig, dass ich mich do driwwe uffreje konn. Un de Heiko Maas deed seu Energie aach besser für annern Theme uffsparn. Was  unnernimmt der eigentlich geje die, wou Kinner misbrauche und dodevo noch Fotos ins Internet doun? Warim wern die nit härter verfolgt un bestroft? Genauso muss doch oaner, der wou sich des ouguckt, ins Kitsche kumme und vor allem aus de SPD raufliege! Ewwe hochkant!!! Ja, ewwe weil de Heiko außer mit seune Maasanzüge noch nit veel positive Schlagzeile gemacht hot – seu Mietpreisbremse-Gesetz is an Harmlosigkeit ja nit zu iwwerbiete – will er vor de Wahl noch emol zeige, was er konn. Vielleicht will er aach seune neue Freundin imponiern, de Natalja Wörner.  Die hot uff jeden Fall es Bundesverdienstkreuz kriggt vom Gauck, weil se sich für mißbrauchte Kinner eusetzt. Do kimmt de Heiko nadierlich in Zugzwang! Ich bin gespannt, ob mehr wie nur en Anzug debei rauskimmt!

Desdeweje bleibt wacker!
Aier Herta

Hinterlasse jetzt eine Antwort