Herta Wacker: Uff’s Babier gebabbelt „20“

Wann ich den veele Mord un Doudschlag betracht, der heitzudoags bassiert, möcht ich am liebste gar koa Nachrichte mehr gucke. Doch dodezu bin ich veel zu neigierisch. Ob die Hillary de Nachfolger vom Obama werd, indressiert mich ja am allermeiste. Immerhin hot de Obama gsoad, dass sie für’n Präsident noch besser geeignet wär als wie er un wie de Bill, also ihrn Mann. Was de Bill oubelangt, deed ich ihm recht gewwe, der is ja gar zu dirrablisch (hochdeitsch: dürr) wurn und macht rim wie de Prinz Philipp von England. Nur, dass der schon immer mit gesenktem Haupt seune Fra hinnerhergedackelt is un selwet noch nie König war. De Bill war ewwe schon Owwerhaupt un kann nur noch de „First Mann“ von de Hillary mache. Zwar will die Hillary aach first wern, allerdings „First Präsidentin“, dann is sie ewwe koa „First lady“ mehr. Des is eigentlich ganz oafach zu kapiern. Ich will des emol sou erklärn: Em Parrer seu Fra is die Frau Pfarrer. Wann ewwe jetzt de Parrer selwet e Fra is, haaßt er Fra Pfarrerin. Un falls die lesbisch verheijet is, haaßt die Fra von de Fra Pfarrerin …….. ja, des waaß ich jetzt aach nit. Des speelt aach für de Hillary koa Roll, weil die ja religionsfeindlich is. Wann de Donald Duck nit noch e paar Leiche von ihr aus em Keller buddele dud, dann werd sie die mächtigste Fra von unsre Welt. Die Merkel is dann nur noch die Zwoddmächtigst, es sei denn die gaasboanisch (hochdeitsch: ziegenbeinige) Theresa Mai aus England dud sich mit ihrne extremistische Schuh vurdrängele. Die is noch nit rischdisch in die Dauning Stroß eugezoge, do dud se schon ufftrumpe wie de Donald un will England e nei Roll in de Welt verschaffe. Do muss unse Merkel eug uffbasse! Mit de Erdogans un Putins werd se vielleicht firdisch, ewwe ougewwerische, eugebilde Weibsleit sin e ganz anneres Kaliber. Un ob des gut dud, wann dann drei Weiwer, die Hillary, die Theresa un die Angela unser Welt regiern!? Wann Weibsleit zusammekumme, dann will doch jede die Schönste seu. Die oa macht de Rock kürzer, die anner de Ausschnitt tiefer orre macht sich die Lippe rot. Die Theresa hat ja schon gsoad, dass sie veel Wert uff Mode legt. Ihrm Kostüm noch zu urteile, dud sie beim Neckermann bestelle. Hoffentlich bestellt die Angela nit aach beim Neckermann! Stellt eich emol vor, die zwo kumme mim gleiche Abendkleid zum G8-Gipfel. Un nächst Juhr kimmt vielleicht noch die Pensen aus Frankreich dezu. Ehrlich gsoad: sou rischdisch fraan konn mich des nit. Ich bin zwar für die Fra, ewwe nit für jede!
Hoalt Eich wacker! Aier Herta

Hinterlasse jetzt eine Antwort