Herta Wacker: Uff’s Babier gebabbelt „26“

Herta Wacker

Letzt Woch bei de Maybritt hot doch oaner gsoad, mir missde uns gar nit sou iwwe den Trump uffreje, weil mir Deitsche aach nit veel besser wärn. Mir deen halt annern die Drecksärwet (arbeit) mache losse, also Mauern baue un Flüchtlinge nit reu losse und sou. Un do hot koaner was degeje gsoad! Debei war des en Bildzeitungs-Kerl, un dene dirf me nit alles glaawe. Ewwe warim reje mir uns dann sou uff ? Ich versuch mich ja mim Dalai Lama zu beruhige, der moant, mir misse die Leit irschd emol kenne lerne. Persönlich werd des ja nit klappe. Also muss ich selwet rausfi nne, ob an dem Trump aach was Gures is? Im Fernseh hewwe se gsoad, dass er iwwes Twitter regiern deed, un des Twitter is ja wie wann me im Home-Offi s schaffe deed. Des kenn ich vun unsere Gerda, des is die Dochder vun meune Kusine Hedwig, die macht des aach, weil ihr Kinner die Gripp hewwe. Alsweire. Jedenfalls heb ich gedenkt, de Trump muss vielleicht aach vun dehoam schaffe, weil er noch seum Bu gucke muss. Der deed nämlich im Internet gemobbt wern, hot unser Anja-Luna gsoad, weil der bei de Siegesfeier vun seum Vatter Fratze gemacht hett. Koa Wunner, dass der dann ins Fratze-Book kimmt ! Seu Mutter, die Melanie, hot vemutlich wenig Zeit für ihrn Sohn. Die muss nämlich die ganz Zeit gut aussehe, weil se vun ihrm Mann ablenke soll. Un des is nit sou oafach ! Ich glaab, die konn sich noch sou oustrenge, der Donald duds immer wirre vermassele. Beim Schwätze macht der alsfurt e Schnut wie en Hinkelsarsch un hot die Zung gerollt wie bei sou em Kamelion. Un dauernd dud er mit seum Finger uff die Leit deire, als wollt er se glei verhafde. Je länger ich den betracht, je mehr erinnert der mich an de Peter Ustinov. Des war en Schauspieler, die Äldere vun Eich wern den noch kenne. Also nit, dass de Trump aussieht wie de Ustinov ! Noa, der sieht aus wie de Kaiser Nero, den wou de Ustinov gespeelt hot. Der Nero soll sich ja iwwe die Römer sou eug geärgert hou, dass er vur laure Zurn die Stadt abgefackelt hätt. Der war halt en Diktator, un vun dene is me gewehnt, dass die mache, was se wolle. Wie de Erdogan orre de Putin orre egal, die doun oafach die Leit verhafte, die wou se kritisiern. Des is in e re Demokratie annischd. Do werd im Parlament iwwe alles debaddiert un abgestimmt. Un koaner konn alloa bestimme wie de Trump mit seum Dekret. Ich wisst nit, dass die Merkel schun oamol e Dekret gemacht hot ! Zuirschd heb ich ja „Sekret“ verstanne, wie „top sekret“. Aach weil’s de Sekretär immer vurgelese hot. Ewwe ganz egal wie’s haaße dud: Dekret, Sekret orre Exkret, des is doch alles Schei…e! Genau wie die Fäk-News. Fäk kimmt doch vun Fäkalien, orre nit?
Glaabt blouß nit alles, was im Fernseh kimmt !

Bleibt wacker und schwätzt minanner.
Aier Herta

Hinterlasse jetzt eine Antwort