Herta Wacker: Uff’s Babier gebabbelt „28“

Herta Wacker

Irgendwie dud mir die Ursula, ich nenn sie immer „von der Leine“, eug laad. Alsfurt muss sie sich verteidische. Gut, sie is halt aach Verteidigungsministerin! Ewwe was hot sie dann Schlimmes gsoad, freeg ich mich, außer de Wuhrhet? Ewwe sou is des halt: Wer mit offenen Karten spielt, ist ein Spielverderber! Un sie hot die Karte offen gelegt, un des kriggt sie jetzt zu spürn. Sie hot halt e bissje generalisiert, un promt fühle sich die Generale getroffe un schieße zerick. Sie wollt doch koaner treffe, un hot doch nur aus Versehe e bissje iwwe’s Ziel nausgeschosse. Des kimmt halt devo, weil die Bundeswehr nur Waffe hot, mit dene me nit rischdisch ziele konn! Spass beiseit, es is nit zum Lache für die Ursula. Außer de Merkel deed momentan koaner hinner ihr stäih. Sou war’s aach beim Karl Theodor zu Guttenberg, un mir wisse ja, dass des nit wirklich beruhigend is. Apropos Guttenberg, der is aach grad wirre bei de CSU am Kumme. Ich glaab, er schreibt dene ihr Wahlprogramm, irgendwou ab. Der dud mir aach irgendwie laad. Wie der 6 Juhr alt war hewwe sich seu Eltern scheide losse. Un me liest ja, wie Kinner do druff reagiern. Die wern verhaltensuffällisch: lieje un klaue. Un dann is do noch die Belastung durch die veele Nome vun dene adlische Urahne: Karl Theodor Maria Nikolaus Johann Jacob Philipp Franz Joseph Sylvester. Sylvester? Den horre vermutlich vun de gräfl ich Katz vebasst kriggt. Un weil seu Fraa noch die Urenkelin vum Bismarck is, hot der Karl Theo schun mehr wern misse als nur en Rollmops. Der Ursula isses ja nit annischd gange. Ohne Doktortitel bischd du halt nix wert bei dene Hochgestochene. Ewwe wann me sou unner Druck steht, do kimmt nix Gescheites raus. Ich kenn des vum Doktor: wann ich oubedingt pinkele soll, do dud’s nit! Des nur als Beispiel fi r die, wou sich nit in de Karl Theodor orre die Ursula neuversetze kenne. Es End vum Lied war, dass alle Zwo bei ihre Doktorarbeit abgeschrewwe hewwe! Die Ursula hot’s nur schlauer ougestellt un hot ihrn Titel behoale dirfe. Als Verteidigungsminister sitzt me ewwe immer uff em Schleudersitz, do hot sich noch koaner lang gehoale: nit de Franz Josef Strauß, nit de Scharping orre de Franz Josef Jung orre de Thomas de Masseur. Warim war die Ursula eigentlich sou scharf uff den Poste, freeg ich mich. Vielleicht will sie ja nur die Zeit rimbringe, bis die Merkel in Rente geht. Ewwe des is ungewiss, ob die zu Lebzeite schun geht. Doch die Ursula hot Ausdauer, des is gewiss. Dass die 7 Kinner uff de Welt gebrocht hot, spricht für ihr Kondition. Orre dodefi er, dass sie die Pille nit verdroahe hot!? Uff jeden Fall bin ich frouh, dass ich des heb seu dirfe, was ich bin: Hausfraa. Bleibt am beste aach, was ihr seid. Alles annere nimmt koa gut End.
Aier Herta

Hinterlasse jetzt eine Antwort