Uff’s Babier gebabbelt „24“

wackerHot des wirklisch seu misse? Häh? Hett die Merkel mit ihrne Kandidadur nit wadde kenne bis Weuhnachde rim is? Sie hot’s oafach nit für sich behoale kenne! Wahrscheuns hot se de Obama ougestachelt. Der is bei seuner Abschiedstour glei zu de „Angela“ geflohe. Also nit ganz glei, zuirschd is er noch Griechenland. Ich nemm ou, er wollt vum Tsipras wisse, was mit de Demokratie lous is, weil die kimmt ja vun durt un is bekanntlich eug (sehr) in Gefahr: wejem Trump, weje de AfD, weje de Penn un weje sou em Hollänner. Des wärn nämlich alles Popoliste, die uns Bürger nur verarsche deen, wie des Wurt ja schun säigd. Des mache die annern zwar aach, ewwe nit sou, dass mir des mirke. Un eigentlich mache die des nur, wann Wahlkampf is, un dann aach nie sou schlimm wie de Donald un die Hillari. Debei hot sich ja die Hillari noch eunischermaße beherrscht, es hot ihr ewwe nix geholfe. Ewwe was sollde sich unse Politiker aach an de Kopp schmeiße? De Sigmar kennt sich iwwe de Angela ihr abgekaute Fingernächel un die Angela iwwem Sigmar seu äbschd Dubbee lustig mache? Un des war’s doch schun. Vermutlich werd de Sigmar ewwe gar nit kandidatiern, weil er zum zwodde mol schwanger is. Im Friehjuhr gitts wirre e Mädsche, de Nome is noch geheum. Die anner Tochter haaßt Marie. Die is jetzt vier un dud ihrn Vadder immer uff em Bildschirm kisse, wann er im Fernseh is. Die kennt ihrn Baba quasi nur zwadimensional? Was kriggt die für en Schock, wann der emol in echt ufftaucht! De Obama moant ja aach, dass es die Merkel mache soll, er deed se uff jeden Fall wähle, hot er gsoad. In Amerika dirf der nur noch Truthähn begnadige un uns will er Vurschrifte mache. Die Merkel soll die Weltordnung uffrecht hoale, weil de Trump alles durchenanner bringt. Undenkbar, der will de Putin zum Freund hou!? Ja, was soll die Merkel dann noch alles mache? Die Flüchtling uffnemme, de Euro rette, es Klima souwiesou, (des is nimmer ganz sou wichtig), de Erdogan bei Laune hoale. Der is doch e tickendes Pulverfass! Ach ja, un Fels in de Brandung soll se aach noch seu, in de EU. Bass blouß uff, Frau Merkel, nit dass es Ihne geht wie meum Alfred. Der is seit 20 Juhr Vursitzende im Schützevereun un bild sich Wunner was druff eu, dass er immer wirre gewählt werd, un zwar einstimmmig. Weil se nämlich koan annern Depp fi nne, der wou die Erwet schaffe will. Liewie Frau Merkel, wann Sie des lese, denke Sie drou: Nur ein knieendes Kamel kann man beladen! Ich winsch Eich fröhliche Weuhnachte und Prost Neijuhr!
Bleibt wacker, Aier Herta

Hinterlasse jetzt eine Antwort